Rreth nesh

Ruajtja e sekretit profesional mjekësor, si në aspektin etik e juridik, është primare për ne. Të dhënat personale që ndahen me mjekun gjatë vizitave, mbahen sekret dhe nuk ndahen me njerëzit e tjerë. Kjo përbën esencën e krijimit të një marrëdhënieje të shëndoshe terapeutike përmes parimit të mirëbesimit.

Është pashmangshmërisht e evitueshme ndeshja në perditshmërinë tonë me stimuj stresantë sapo lëmë derën e shtëpisë e shpeshherë, edhe brenda mureve të saj. Të gjithëve na ka ndodhur që një problem në punë, një zënke me një njeri të dashur, vetmia, shqetësimet e mbledhura për një kohë të gjatë, të na kenë ndikuar thellë dhe të na kenë kushtuar netë pa gjume, ankth, mërzi, si të pasurit vështirësi në proçesin e të menduarit ose të menduarit jo të kthjellët, sjellje jo të përshtatshme që mund të kalojnë kufinjtë e luhatjes që shumica e njerëzve ndiejnë herë pas here. Ato ndërhyjnë në përditshmërinë tuaj, duke krijuar vështirësi në marrëdhëniet me personat tuaj të dashur, në punë etj, e duke përkeqësuar në mënyrë të tillë cilësinë e jetës. Një çrregullim i shëndetit mendor është shpesh i padukshëm. Çfarë do të na sherbente më mire në të tilla momente se një ambient i rehatshëm dhe një specialist që dëgjon, këshillon dhe trajton, larg stigmës dhe tërësisht konfidencial?

Të marrit ndihmë herët, mund të luajë një rol të rëndësishëm në parandalimin e përkeqësimit të simptomave dhe në bërjen e shërimit më të mundshëm.

Në të tilla raste, hapi i parë është të bëhet një vlerësim psikiatrik gjatë një vizite mjekësore. Në takimin tuaj të parë me një psikiatër, ju do të bashkëbisedoni me të për të kuptuar sesi kane lindur vështirësitë tuaja dhe si po ndikojnë në jetën tuaj tani. Do t’ju drejtohen pyetje për jetën tuaj personale, familjare, kohën e fillimit të shqetësimeve, rëndesen e tyre, praninë e sëmundjeve të tjera mjekësore që mund të keni. Mund t’ju kërkohet të plotësoni formularë specifikë dhe do t’i nënshtroheni edhe një ekzaminimi fizik objektiv. Mund të jetë e nevojshme që ju të kryeni analiza laboratorike, ekzaminime imazherike, sipas rekomandimit të mjekut për të gjetur një shkak të mundshëm të simptomatikës. E gjitha kjo për të arritur në formulimin e një plani individual të përshtatshëm trajtimi.

Takimet e ardhshme janë shpeshherë të nevojshme për të parë nëse terapia ka qenë efikase (mjekimi shpeshherë do kohë të arrijë efektin maksimal, doza mund të ketë nevojë për ndryshime, dhe gjithashtu, njerëzit kanë pergjigje individuale ndaj mjekimeve psikiatrike).